Vencer o Trapagaran, unha obriga para o Teucro
Por Diego Espiño
Xornada clave para a Sociedade Deportiva Teucro no seu obxectivo de eludir o descenso á Primeira Nacional.
Os pontevedreses viaxan ao País Vasco para medirse este xoves 29 de abril (19.15 horas) ao Trapagaran, recuperando o encontro que debía disputarse o día 10 pero que foi aprazado por un gromo de covid no conxunto biscaíño.
Un triunfo permitiría ao Teucro non só escapar da zona de descenso na que agora se atopa, senón escalar mesmo ata a terceira posición para poñerse con 15 puntos, polos 14 que teñen Zarautz, Ikasa Madrid e Sarrià. O contrario sería meterse nun bo problema con só partidos máis por disputarse.
O Trapagaran, a pesar de comezar a segunda fase con 0 puntos, comezou lanzado con tres vitorias consecutivas ata que chegou o gromo de covid, que obrigou ao seu plantel a confinarse case dúas semanas. Tras ese contratempo volveu á actividade a fin de semana caendo derrotado ante o Lalín.
Con Marko Dzokic recuperado da contusión cerebral que lle obrigou a retirarse nos primeiros minutos en Zamora, e a pesar de estar Fede Wermbter entre algodóns, Irene Vilaboa puido pechar a convocatoria cos seus xogadores de maior peso, aínda que con algunhas baixas como as de Pedro Sánchez, David Rey ou Iago Rodríguez.
A expedición teucrista partiu á primeira hora deste mércores rumbo ao País Vasco utilizando para iso as furgonetas da Federación Galega de Balonmán, cedidas ao club para afrontar tan importante desprazamento.
Relacionadas:
-
Sufrida e valiosísima vitoria do Teucro na pista do Trapagaran para escapar de postos de descenso (24-25)
Por Diego Espiño |
-
O Teucro estrélase co Zamora e regresa de vacío (29-25)
Por Almu Dapena |
-
Teucro e Trapagaran fixan o seu encontro aprazado para o xoves 29 de abril
Por Redacción |
-
O Teucro derrota o Ikasa Madrid para facerse coa primeira vitoria da fase pola permanencia (29-28)
Por Almu Dapena & Cristina Saiz |