Pasarón acollerá o próximo partido do Pontevedra B, fronte ao Beluso
Por Redacción
O Pontevedra Club de Fútbol quixo premiar o bo inicio de tempada do seu filial e aproveitando que por segunda semana consecutiva o primeiro equipo actuará a domicilio permitiralle xogar no Estadio Municipal de Pasarón.
Desta forma o Pontevedra B cambiará o seu habitual campo de xogo, A Xunqueira, para recibir o vindeiro domingo 2 de maio (18.00 horas) o Beluso.
A pesar da súa derrota en Vilalonga a pasada xornada, o segundo equipo granate marcha segundo do seu grupo de Preferente con 11 puntos, a 1 do liderado e empatado coa Gran Peña, que é terceiro.
Restan catro xornadas para o final da primeira fase e o obxectivo é asegurarse un posto entre os dous primeiros, para así poder disputar a fase de ascenso a Terceira División, ou á Terceira RFEF como pasará a ser denominada o próximo curso.