Conta atrás para a XXVI edición do Medio Maratón de Pontevedra, que se celebrará o vindeiro domingo 17 de outubro.

A popular proba atlética pechou as súas inscricións e fíxoo rozando o límite máximo dun milleiro de participantes fixado pola organización, a cargo da Sociedad Gimnástica e o Concello de Pontevedra.

En concreto anotáronse 949 persoas, esgotando as 600 prazas dispoñibles para o medio maratón de 21,1 quilómetros xunto a 349 deportistas que confirmaron a súa presenza na carreira de 10 quilómetros, das 400 prazas dispoñibles.

"Somos conscientes de que a xente segue mostrando certa reticencia para competir por culpa da pandemia, así que é todo un logro cubrir todas as prazas no medio maratón e que tan só queden 50 sen cubrir nos 10 quilómetros", recoñece o director técnico da proba, Víctor Riobó.

Segundo debulla a organización, o 85% dos rexistrados son homes (807) e o resto mulleres (142), sendo máis da metade dos participantes da provincia de Pontevedra (512), seguida da Coruña (249), Ourense (81) e Lugo (60). Ademais confirmaron a súa anotación 47 atletas de fóra de Galicia.

O Medio Maratón de Pontevedra dará comezo ás 10.00 horas do domingo coa versión curta de 10.000 metros, coas saídas da carreira longa a partir das 10.30 horas.