"Estamos nun momento moi fodido da economía como para que na Segunda RFEF haxa prezos tan elevados"
Por Diego Espiño
O corpo técnico e o plantel do Pontevedra Club de Fútbol non son alleos ao malestar existente entre a afección granate polo prezo fixado polo Coruxo para as entradas do encontro do próximo domingo 20 de marzo (18.00 horas, O Vao).
"Entendo que estamos nun momento moi fodido da economía como para que nunha categoría tan baixa como é a Segunda RFEF haxa prezos tan elevados", defendeu o rolda de prensa este venres o adestrador do Pontevedra, Ángel Rodríguez.
A pesar de que prefire centrarse na parte deportiva, o técnico é consciente do papel importante que podía xogar en Vigo a súa afección. "Para nós é importantísimo que a nosa afección se desprace connosco, vímolo o día de Arenteiro, creo que é importante que se despracen contra e Coruxo pero entendo que cada un ten unhas posibilidades económicas e non hai que forzar nada a ninguén. Nós vaian ou non vaian imos tentar dar o máximo, facer un bo partido, tentar ir a por a vitoria desde o inicio e se o conseguimos e non o podemos celebrar alí celebrarémolo aquí ao chegar cos nosos afeccionados", explicou.
Rodríguez asegurou tamén entender "que eses prezos están aí por un motivo ou por outro", pero convidou a facer unha reflexión xa que "deberiamos pensar que non estamos no mellor momento para poñer estes prezos".
No que se refire ao estritamente deportivo, o adestrador granate só contará esta semana coa ausencia do sancionado Charles para medirse a un Coruxo en plena forma. "Espérome un rival que xoga ben ao fútbol, que é atrevido, é máis vertical que na primeira volta e manexa outros tempos de partido", eloxiou o preparador granate contento tamén polo feito de que o encontro se dispute finalmente no Vao unha vez finalizada a súa renovación e nun terreo de xogo en condicións envexables, algo que "é bo para o fútbol".
O colexiado do choque entre Coruxo e Pontevedra será o castelán-leonés Omar Álvarez Rodríguez.
Relacionadas:
-
Empate con sabor a derrota do Pontevedra na reinauguración do Vao (2-2)
Por Manu Otero |
-
Antiviolencia propón unha multa de 100 euros ao Pontevedra tras exhibirse unha bengala en Pasarón
Por Diego Espiño |
-
Polémica polas entradas do Coruxo-Pontevedra
Por Diego Espiño |
-
O Vao, aliado para o Pontevedra ante a ameaza do renacido Coruxo dos irmáns Montes
Por Diego Espiño |
-
Un momento clave da tempada, pero mirando "partido a partido"
Por Diego Espiño |
-
Vitoria e portería a cero con dedicatoria especial para Borja, socio granate de 31 anos falecido esta semana
Por Almu Dapena & Cristina Saiz | Creada e actualizada
-
Goleada balsámica do Pontevedra fronte á Gimnástica Segoviana (3-0)
Por Diego Espiño & Cristina Saiz |