Tras máis de seis anos de xestións e unha longa espera administrativa, o Ballet de Galicia logrou o permiso de obra para transformar o antigo Liceo Recreativo de Estribela na súa futura sede.
A noticia, que chega cargada de simbolismo, coincide ademais co aniversario do seu director, Diego Landín, converténdose no "mellor agasallo posible despois de tanto esforzo", sinalou a contorna próxima do proxecto.
O edificio, que pertence á propia entidade, será sometido a unha renovación completa para acoller un conservatorio profesional de danza e un espazo cultural de referencia.
O plan inclúe salas pensadas para a práctica de danza a alto nivel, pero tamén adaptadas a actividades formativas e escénicas.
Ademais, contará cun espazo para actuacións que permitirá abrir as súas portas ao público e reforzar o seu papel como punto clave na vida cultural da zona.
As obras, que se prolongarán durante aproximadamente dous anos, incorporarán tecnoloxía avanzada e condicións modernas para o desenvolvemento creativo.
O Ballet de Galicia insiste na dimensión social desta transformación: "Non se trata só de recuperar un inmoble, senón de devolverlle alma e movemento a un lugar con moita historia. Queremos que Estribela recupere a súa luz e que este espazo sexa un impulso cultural e social".
O proxecto da reforma estará dirixido polo arquitecto Anselmo Villanueva Peón, presidente da delegación de Pontevedra do Colexio Oficial de Arquitectos de Galicia.