La Fuga e Obús poñen o broche ao Invernia Fest

A primeira de moitas.

Iso esperan todos os que foron parte da primeira edición do Invernia Fest no Recinto Feiral de Pontevedra.

Se o venres a xornada inicial buscou elevar a temperatura a base de música cos grupos Chroma, Efecto Mariposa, Sôber e os Green Hot Peppers, o sábado esperaba o día grande do evento.

Desde moi cedo, á hora do vermú, o Recinto encheu de actividade primeiro cunha banda como Liorta da que forma parte un dos promotores do Invernia Fest, o extriatleta Javier Gómez Noya, para seguir despois cunha programación que se prolongou até a madrugada.

Gansos Rosas, tributo a Guns N' Roses, e as galegas Agoraphobia foron subindo o nivel de intensidade até chegar ás dúas formacións que encabezaban o cartel do sábado.

La Fuga e Obús, ambos os dous cunha gran traxectoria ás súas costas, non defraudaron aos seus incondicionais, sedentos de música en directo a estas alturas do ano.

Esa é a forza do Invernia Fest, organizar todo un festival desafiando ao frío e a choiva, e aspirando a consolidarse dentro da programación da Boa Vila.

A festa, que contou con Djs entre cada concerto, chegou ao seu fin tras a actuación dos madrileños Afónica Naranjo.