Primeira confirmación para os concertos que formarán parte da programación da Festa do Mar, que se celebrará en Combarro, entre os días 28 e 31 de agosto.
Trátase da banda Miss Caffeina, que actuará en Poio o venres 29 de agosto, segundo confirmou este xoves o goberno municipal.
O grupo madrileño, unha das referencias da música indie nacional, ofrecerá un directo gratuíto e "extremadamente bailable", destaca o Concello, na Praza da Chousa.
Nel mesturarán temas novos con grandes éxitos como Merlí, Reina ou Mira como vuelo, que consolidaron a Miss Caffeina como unha das bandas máis destacadas do panorama musical, ou Cuando acabe el verano, elixida como a canción oficial de La Vuelta Ciclista a España en 2024.
Tras anunciar o ano pasado un parón despois de catro anos intensos de xira continuada, a banda trae unha nova proposta chea de enerxía e emoción.
Miss Caffeina está traballando xa no seu próximo álbum, Buenasuerte, que verá a luz en outubro, e que levará o seu son a novos niveis como só eles o saben facer.
Como punto de partida, xa se coñecen os primeiros singles deste novo traballo, Debería estar brillando e Argumento de mierda, uns temas que xa xeraron grande expectación tanto entre os seus fans como entre novos oíntes que se suman cada día ao seu universo sonoro.
Para a Festa do Mar de Combarro, o Concello de Poio volverá a apostar nesta edición por seguir potenciando a orixe, a tradición e identidade mariñeiras, cunha programación ampla, variada, de calidade e para todos os públicos que se dará a coñecer nas vindeiras semanas.