Hai persoas que fan posible o imposible, que traballan desde a discreción e o esforzo diario para que a cidade brille como merece. José Luís Sarandeses é un deses nomes imprescindibles, sempre ao pé do canón, sempre disposto a dar o mellor do seu para que todos os pontevedreses gocemos dunha programación cultural viva, diversa e emocionante. Non importa a hora nin o día: el está aí, coidando cada detalle, empuxando cada proxecto, pondo corazón onde outros só verían rutina. Grazas a esa entrega incansable, Pontevedra converteuse nun lugar onde a cultura non se consome, senón que se celebra, compártese e convértese en parte da nosa identidade colectiva.
- Dime unha pregunta que non che gusta que fagan
Non hai preguntas mal expostas senón respostas mal interpretadas.
- Como é a túa relación con Pontevedra?
De amor desde que nacín.
- Como te definirías?
Amigo dos meus amigos, traballador e sinxelo.
- Con que xeración te identificas máis: baby-boom, X ou millenial?
Coa miña, baby-boom.
- Que características ten a túa xeración?
Pois puidemos gozar da rúa, dos barrios, iamos tocar o "telefonillo" dos nosos amigos para que baixaran xogar… todo iso dá contido a unha vida de adulto.
- En que momento pasas de gozar das festas a organizalas?
No ano 1986 eu formaba parte do Consello Escolar do meu instituto e o representante do concello era o concelleiro de Cultura. Viu que me gustaba organizar cousas, como o cineclub, mostras etc. e fichoume para a comisión de festas. Aí empezou todo, e ata hoxe.
- E en que etapa vital dirías que están as festas en Pontevedra?
No seu mellor momento sen ningunha dúbida. Supéranse as expectativas ano a ano aínda que queda moito por facer. Por exemplo Halloween…cada vez a xente celébrao máis e aínda temos que adaptalo á cidade.
- A Feira Franca, morrerá de éxito?
En absoluto, pero debemos coidala entre todos, estendeuse cara a máis zonas da cidade crecendo en novos espazos e tamén cara á noite, pero polo menos durante o día debemos preservala como unha recreación histórica e unha festa familiar.
- En ocasións fálase das excentricidades dalgúns artistas…o máis raro que che pediron para celebrar un concerto?
Desde caviar ata botellas de auga dunha marca concreta que tivemos que ir buscar a Lisboa… ou o caso de Mecano que nos pediron 300 toallas para usar durante o concerto, das cales usaron a metade (risas).
- Que é máis importante, o orzamento ou a implicación cidadá?
Ambas, pero é certo que o tecido social é fundamental. Pensa que o que Vigo pode gastar nun só concerto, é o orzamento co que eu traballo 6 meses. Aínda que hai festas como o Entroido, nas que non habería diñeiro para pagar todo o traballo que fan tantas agrupacións. Pontevedra é unha cidade gozosa.
- Que é a amizade?
Algo marabilloso que ti decides por onde levar.
- Se puideses viaxar no tempo, irías ao pasado ou ao futuro?
Ao futuro, a ver as festas da Peregrina dentro de 100 anos.
- Unha parte da túa casa que che apeteza intervir?
O soto, unha materia pendente (risas).
- Dime unha canción que che emocione.
Resistirei, por moitos motivos.
- Frío ou calor?
Frío
- Que hai despois da vida?
Pois espero que outra vida.
- O último capricho que te deches?
Tomar unhas sardiñas asadas coa miña familia.
- Cando dixeches por última vez "quérote"? a quen?
Hoxe a miña filla.
- A quen che gustaría ver nesta sección?
Ao padre Alberto.
- E por último, que vas facer en canto acabe a entrevista?
Pois teño unha cita médica.
Para José Luís, Pontevedra sabe a vida, cheira a paz, é de cor azul e soa a casa. Definitivamente, Sarandeses sente Pontevedra.
O CUESTIONARIO
− Nunca saio de casa sen… o meu móbil
− Na miña neveira sempre hai… auga
− No meu armario destaca… as miñas camisas
− A idade é…. experiencia, momentos…vida.
− Sempre fun o ollo dereito de… os meus pais
− Pontevedra ten alma de… tranquilidade
− Creo en… Deus
− O ano que marcou a miña vida foi… o 1986 cando coñecín a miña muller.
− O mellor agasallo que me poden facer é… unha comida con sobremesa.
− O meu lugar no mundo é… Pontevedra
− Se non puidese vivir en Pontevedra viviría en… A Coruña
− O meu momento favorito do día é… a mañá
− Pontevedra… casa.