A Real Federación Española de Piragüismo (RFEP) contará durante a tempada 2026, un ano máis, co encoro de Pontillón do Castro como unha das súas sedes preferentes para as grandes competicións nacionais.
No calendario aprobado pola RFEP figuran até tres competicións de máximo nivel na modalidade sprint que se disputarán no Complexo Deportivo David Cal de Verducido baixo a organización da Federación Galega de Piragüismo.
A primeira delas será a 1ª Copa de España de Sprint Olímpico do ano, prevista para os días 11 e 12 de abril e que sempre conta con gran importancia ao xuntarse habitualmente co primeiro Selectivo Nacional, que establece os padexeiros que afrontarán as grandes competicións internacionais.
Estes selectivos non están aínda fixados, pero si se sabe xa que a primeira Copa do Mundo de 2026 celebrarase en Szeged (Hungría) do 8 ao 10 de maio.
Ademais Campionato de Europa de Sprint disputarase en Montemor-o-Velho (Portugal) do 10 ao 14 de xuño e o Campionato do Mundo terá lugar en Oklahoma (Estados Unidos).
Pero volvendo ao plano nacional, o encoro de Pontillón do Castro tamén será escenario da Copa de España Xóvenes Promesas Cadete os días 6 e 7 de xuño, e do LVII Campionato de España Sprint de Xóvenes Promesas (10-12 de xullo).
Ademais o calendario establece a disputa en Verducido de xornadas das ligas nacionais de kaiak-polo de Primeira División (9-10 maio) e Terceira División (23-24 maio).
Por último Vilaboa foi designada como sede da 1ª Copa de España de Kaiak de Mar (28-29 marzo).