Do mesmo xeito que outros clubs de elite da provincia, como Pontevedra e Teucro, o Poio Pescamar Fútbol Sala asinou este martes un acordo de patrocinio coa Deputación.
Ao contrario que a pasada campaña, cando se outorgaba unha subvención, nesta ocasión o acordo económico outórgase como patrocinio do primeiro equipo, que participa na Primeira División Feminina, máxima categoría nacional.
En total, a institución provincial achega 25.000 euros ao club vermello, unha cantidade "muy importante" para cadrar o orzamento do equipo, segundo recoñeceu o seu presidente, Juanjo García.
Esta cantidade supón un incremento de 5.000 euros con respecto ao percibido da Deputación o curso pasado.
A presidenta provincial, Carmela Silva, sinalou na firma do acordo que lle facía "especial ilusión" colaborar cun club que potencia o deporte feminino como o Poio Fútbol Sala. Ao acto acudiron tamén o alcalde de Poio, Luciano Sobral, e a deputada de Deportes, Chelo Besada.