O Club Baloncesto Arxil deu un paso de xigante no seu obxectivo de lograr a permanencia en Liga Feminina 2 tras imporse este domingo ao Gijón Basketball nun duelo directo pola salvación que se resolveu na prórroga (90-91).
O conxunto verde sacou petróleo da súa solidez nos momentos chave e asinou unha vitoria de mérito para comezar o ano.
O partido estivo igualado desde o inicio, aínda que co equipo local máis intenso para levar o primeiro cuarto (21-18) e manter a súa lixeira renda ata o descanso (41-38).
Tras o paso por vestiarios, o Arxil empezou a crecer apoiado na súa mellora defensiva e no acerto de cara ao aro de Nia Daniel, que foi un auténtico pesadelo para as xixonesas durante a segunda metade.
O cadro pontevedrés deu a volta ao marcador no final do terceiro período (54-56) e deixou o encontro completamente aberto a falta dos últimos minutos.
Nun último cuarto no que todo estaba por dicir, ambas as escuadras intercambiaron canastras e alternaron as vantaxes.
O Gijón tivo opcións para pechar o partido, pero o equipo lerezano non se rendeu e logrou forzar a prórroga cunha canastra de Lemongang sobre a bucina tras unha xogada ensaiada desde a banda.
No tempo extra, o sangue frío das visitantes foi a que marcou a diferenza. Con 90-89 no marcador e só seis segundos por xogarse, un erro no tiro libre de Merissah Russell (autora de 41 puntos para as xixonesas) e un rebote defensivo decisivo permitiron a Margarita Moreira facerse co balón e provocar unha falta persoal.
A xogadora do Arxil anotou os dous tiros libres e sentenciou o encontro sen marxe para a reacción local (90-91).
A gran protagonista por parte do Arxil foi Nia Daniel, recentemente chegada no mercado de inverno procedente do Maristas Coruña, que asinou 25 puntos e liderou o ataque verde nos momentos fundamentais.
Consulta as estatísticas neste enlace