A Sociedad Deportiva Teucro xa é, para todos os efectos, equipo da máxima categoría do balonmán nacional.
A Comisión de Control Económica da liga Asobal deu este martes o visto e prace á documentación presentada polo club pontevedrés para inscribirse na competición.
En total o Teucro tivo que facer fronte ao pagamento de 12.100 euros (10.000 + IVE) a Asobal polos dereitos de competición na máxima categoría, ao que se suman 7.500 euros pola inscrición na Federación Española (dos que tivo que abonar por adiantado o 50%) e o 'pagaré' presentado por valor de 13.000 euros como cota de socio da asociación de clubs, con vencemento ao 15 de setembro.
Ademais a directiva tivo que presentar unha serie de avais ante ambas as institucións por valor de 58.200 euros (6.000 deles ante a Federación).
Cumprimentados todos estes trámites e presentada a documentación en tempo e forma, os azuis foron confirmados como equipo de Asobal por pleno dereito, esquecendo o acontecido dous anos atrás cando a liga tentou excluír aos pontevedreses e ao Cangas por discrepancias na súa inscrición.
Aínda que o esforzo económico foi importante, na parte positiva a entidade teucrista recibirá esta tempada 20.000 euros en concepto de dereitos televisivos, partida que foi incluída no orzamento aprobado pola Comisión Económica.
Engade Pontevedra Viva como fonte preferida de Google de balde
Mantente informado coas últimas noticias de actualidade.