Segunda xornada no Campionato de España de Natación en Piscina Curta de Sabadell e segunda medalla para o Club Natación Galaico.
Se o venres a protagonista foi Águeda Cons cun ouro no 1.500 libre, este sábado foi a quenda para Bea Gómez Cortés, ao lograr a prata nos 400 estilos.
A nadadora pontevedresa superou unha vez máis as dificultados provocadas polos problemas de saúde que arrastra para acabar segunda cun tempo de 4:40.18, nunha dura pelexa con África Zamorano (4:40.88), terceira. O primeiro posto foi para Catalina Corró (4:35.36).
Na mesma proba, os 400 estilos, Paula Goyanes concluíu no posto 11 cunha marca de 4:52.76.
O botín puido ser maior para o Galaico, xa que Águeda Cons rozou a súa segunda medalla do campionato ao ser quinta nos 400 libre (4:10.30) a menos dun segundo da segunda e terceira posición. Bea Gómez foi novena nesta proba (4:13.26), Paula Goyanes acabou na posición 18 (4:17.08) e Lara Gómez na 24 (4:20.14).
Ademais Lara Gómez tamén foi vixésimo segunda nos 200 bolboreta (2:21.62), Clara Otero finalizou no posto 41 nos 50 libre (27.45) e 34 nos 200 costas (2:23.18) e Daniel Sánchez no 44 na mesma proba, os 200 costas (2:10.14).