Arranca en Pontevedra o Campionato de España de Seleccións Autonómicas de natación

O futuro da natación española reúnese esta fin de semana no Complexo Deportivo Rías do Sur de Ponte Muíños. Ao redor de 540 nadadores representarán ás 17 comunidades autónomas e á cidade autónoma de Melilla nas modalidades junior e infantil no Campionato de España de natación por federacións autonómicas. Este evento non se celebraba en augas pontevedresas desde o ano 2007.

O pistoletazo de saída produciuse este venres ás 10 da mañá coa proba de 100 metros bolboreta para a categoría feminina entre 14 e 18 anos. Carlota Rodríguez obtivo a primerira vitoria do día para a selección madrileña na categoría infantil e Irene Ciercoles fixo o propio para Cataluña na modalidade júnior.

Galicia participa cunha selección de 32 nadadores repartidos nas diferentes categorías e modalidades. Entre eles están Sofía Barros, Marlène Rocha e Lois Chan, nadadores do Club Natación Galaico. O adestrador do club pontevedrés, Sergio Silva, tamén forma parte da expedición.

A competición desenvolverase ao longo da fin de semana en horarios de mañá e tarde e concluirá o domingo coa entrega de trofeos.

Este acontecemento servirá como test para os deportistas de cara a citas internacionais como o Campionato de Europa Júnior ou a Copa Comen.

Doutra banda, este campionato marca o inicio de diversas probas acuáticas que acollerá Pontevedra nos próximos meses.

A máis próxima no calendario é a Copa Federación de Waterpolo, que se celebrará no Complexo Deportivo Rías do Sur de Ponte Muíños os días 21 e 22 de febreiro.

A finais de maio celebrarase no mesmo escenario a Copa do Mundo de Natación Artística.