Só nove segundos separaron á pontevedresa Carla Goyanes de lograr o seu obxectivo no Campionato do Mundo Júnior de Natación en Augas Abertas que se está disputando en Eilat, Israel.
A deportista do Natación Galaico entraba en competición na primeira xornada do Mundial, na proba dos 7,5 quilómetros na que se proclamou recentemente subcampioa europea e na que é tamén subcampioa nacional.
Goyanes marcábase como meta poder estar entre as 10 mellores da clasificación, pero tivo que conformarse co posto 14 cun tempo de 1 hora, 34 minutos e 43 segundos, a só 9 segundos da décima clasificada, a francesa Ilona Maille.
A medalla de ouro levouna a estadounidense Chase Travis (1:32:02), seguida das italianas Giulia Berton (1:32:59) e Giulia Salin (1:33:00), mentres que a española Ane de la Fuente fíxose coa quinta posición (1:33:07).
Toda unha experiencia para Carla Goyanes que pecha así unha tempada na que logrou asinar un gran progreso a nivel nacional e internacional.