A Selección Española pechou este sábado a súa participación no Mundial de Grappling e Grappling-gi celebrado no Pavillón Municipal de Pontevedra con seis medallas na última xornada de competición que, sumadas ás 38 acadadas nas tres primeiras xornadas, fan un total de 44.
Con dous ouros e catro bronces, España puxo o broche de ouro a un campionato redondo no que os galegos Pablo Vázquez, María José Raja e Vanesa Muíños non puideron subir ao podio.
Nico Medina (-77 kg), campión do mundo de grappling o día anterior, e Arturo Salas (-84 kg), lograron os dous ouros da última xornada. Salas, compartiu podio co tamén español Alberto González, quen un dos catro bronces nacionais. O resto de metais foron de Pablo Estepa (-93 kg), Naiomi Matthews (-53 kg) e Merytxel González (-74 kg).
Con estas medallas e sumadas ás das xornadas anteriores, España situouse segundo no medalleiro dun campionato que Kazajistán dominou dende o principio e no que finalmente logrou 23 ouros e un total de 56 medallas, superando á Selección Española en 13 ouros e 12 metais.
Pontevedra chega así ao ecuador dos 15 días nos que se converteu na capital da loita mundial. Será a partir do luns cando comece a celebración do Campionato de Loita Olímpica.