Chega a tempada de atletismo ao aire libre e a Sociedad Gimnástica de Pontevedra lanzouse a organizar un ano máis o Circuíto de Atletismo en Pista de Pontevedra.
Unha iniciativa coa que desde hai anos pretende ofrecer os seus atletas e tamén a deportistas do resto de Galicia unha oportunidade para medir o seu estado de forma e buscar marcas oficiais para os grandes campionatos da tempada.
Nesta ocasión o circuíto contará con seis eventos, todos eles a celebrarse até o próximo mes de xullo nas instalacións do Centro Galego de Tecnificación Deportiva.
A primeira desas citas, este mesmo mércores 8 de abril, será un control da súa propia escola de atletismo.
Seguiranlle no calendario o LII Trofeo Boa Vila (6 de maio), o L Trofeo Sociedad Gimnástica Pontevedra (20 de maio), o XXXI Trofeo Cidade de Pontevedra (3 de xuño), o XXVII Memorial Celso Mariño (17 de xuño) e o L Trofeo Virxe Peregrina (17 de xullo).