Despois de competir en Tudela cun equipo de circunstancias, con importantes ausencias por lesión e sanción, o Pontevedra recuperará efectivos para o choque do domingo (17:00 horas) en Pasarón ante un dos seus inmediatos perseguidores, o Lealtad de Villaviciosa.
Luisito, salvo contratempo ao longo da semana, poderá contar con Álex Fernández, que volve estar dispoñible tras superar unha grave lesión muscular que lle apartou durante as últimas semanas dos terreos de xogo. Ademais Kevin Presa, superados os problemas físicos que lle fixeron descansar o domingo, apunta ao once.
Boas noticias para o técnico granate, que tamén recupera a Verdú e Borjas cumprida a súa sanción dun partido por acumulación de amoestacións, aínda que ante o Lealtad perderá a Capi por este mesmo motivo, ao ver en Tudela o seu quinto cartón amarelo.
Desta forma só Adrián Mouriño seguirá sendo unha semana máis inquilino da enfermaría e Luisito deberá facer descartes para elaborar a convocatoria.
Tras a xornada de descanso do martes, o Pontevedra retomará o mércores os adestramentos en Príncipe Felipe, un descanso que non se traslada aos despachos porque a dirección deportiva segue tentando pechar a fichaxe dun dianteiro.
Desde o club confían en que o ariete se incorpore ao equipo esta mesma semana, sen esperar ás últimas horas dun mercado que pechará finalmente ás 18:00 horas do próximo luns, 1 de febreiro. Ata entón, todo pode pasar.