O Campionato do Mundo de Ximnasia Trampolín celebrado en Pamplona consagrou, se non o estaba xa, a Melania Rodríguez na elite do seu deporte.
A deportista do Ximnasia Pontevedra revalidou o seu título mundial de dobre minitramp e colgou ademais unha medalla de bronce por equipos na mesma proba, éxitos polos que foi recibida este mércores no Concello de Pontevedra polo alcalde, Miguel Anxo Fernández Lores, e a edil de Deportes, Anabel Gulías.
"É unha deportista que sempre nos dá moitas alegrias e que nos ten que dar moitas no futuro", afirmou o alcalde.
Un talento para a ximnasia labrado na Boa Vila, desde onde pensa seguir adestrando e desde onde prepará o ambicioso asalto aos Xogos Olímpicos de Los Ángeles 2028.
"Moitas veces preguntáronme que por que non marchaba ao CAR de San Cugat e a min de Pontevedra non me moven", sinala Melania.
Iso non significa renunciar ao soño olímpico, un reto que "leva sendo o meu obxectivo desde que tiña cinco anos, primeiro en ximnasia artística ata que o deixei, e en Paris 2024 escapóuseme polos pelos", recoñece.
Pero agora é diferente. Xa foi finalista nun mundial en trampolín, a proba olímpica, e "síntome moito máis preparada tanto física como mentalmente. É o meu obxectivo e creo que o podo conseguir", afirma de maneira rotunda.
Por iso os seus próximos obxectivos empezan a virar sobre todo no trampolín, co Campionato de Europa como o Mundial de 2026 no punto de mira, nos que aspira a entrar na final. Pola súa banda no dobre minitramp "xa veremos que vai pasando, vou fluíndo un pouco máis".