Seguen as despedidas no Pontevedra Club de Fútbol.
Se o martes foi Miki Bosch o que confirmou a súa saída ao Hércules, este mércores tocoulle a quenda a Miguel Cuesta, que anunciou a súa saída do club granate a través dunha carta aberta aos afeccionados compartida nas súas redes sociais.
O futbolista asturiano rexeitou a opción de renovar e opta por un novo camiño profesional.
Faino despois de tempada e media en Pasarón, onde chegou en Segunda RFEF como extremo procedente do Marino de Luanco e marcha como un dos laterais zurdos de maior progresión de Primeira RFEF.
"Voume cun sabor un tanto amargo por non poder gozar xunto a vós ese play-off tan desexado", recoñeceu Cuesta sobre a súa marcha.
Afirma ademais que "tal vez me estea a despedir antes do que me gustaría, pero sempre levarei Pontevedra no meu corazón, desexando que poida volver canto antes ao fútbol profesional, o seu lugar".
Na súa mensaxe agradeceu ademais o apoio recibido na súa primeira experiencia fóra de Asturias, recoñecendo á afección pontevedresa que "me fixestes comprender rápido o valor e a paixón coa que se defende esta camiseta, este escudo e así o tentei facer ver en todos os partidos na que a vestín".
Coa marcha de Miguel Cuesta, que todo apunta seguirá a súa carreira no Alcorcón, amplíase a nómina de saídas xunto a Alain Ribeiro (foi confirmado este mércores como novo xogador do Sabadell de Segunda División), Miki Bosch (Hércules) e Montoro (Sant Andreu), xunto aos cedidos Joao Resende, Diego Gómez, Rubén López e Luisao Macías.