Paso a paso, a SD Teucro vai dando forma ao equipo co que regresará a próxima tempada á liga Asobal. A última novidade a este respecto é que o club logrou pechar a renovación do extremo esquerdo Iván Fernández.
O pontevedrés seguirá dous anos máis no equipo, ás ordes de Quique Domínguez. A próxima será a súa terceira tempada no primeiro plantel.
O Teucro mostrara o seu interese en contar co canteirán para o seu novo proxecto deportivo e celebra ter chegado a un acordo que permitirá, sinalan, que Iván Fernández debute en Asobal "co club que o viu crecer".
Con esta renovación, a SD Teucro conta xa con sete xogadores para a vindeira campaña: Ricardo Amérigo, Dani Hernández, Gonzalo Carró, David García Pichel, Erik Balenciaga -ata agora a única fichaxe-, Edu Moledo e Iván Fernández.