Desde a confirmación do seu histórico ascenso á Liga Asobal, o Club Cisne púxose ao choio para tentar lograr os recursos económicos necesarios que lle permitisen confirmar o salto á máxima categoría case doblando o seu orzamento.
A procura prioritaria era a dun novo patrocinador principal, e as xestións frutificaron cun acordo que foi presentado como a "fichaxe máis importante da tempada", segundo sinalou o presidente do club, Santiago Picallo.
A partir de agora a denominación do equipo será a de Dicsa Modular Cisne, ao asociarse co grupo pontevedrés JRU, do sector da construción.
Este acordo permite ao Cisne "ter maior tranquilidade" a nivel económico, sinalou Picallo, tanto que "neste momento o equipo sae ao 100%" na Liga Asobal, confirmou o dirixente.
Na presentación do novo patrocinador un dos responsables da firma, Juan Ramírez, afirmou que "para nosa empresa e para toda a cidade é un orgullo ter un equipo 100% galego na máxima categoría".
O compromiso adquirido co novo patrocinador principal, cuxo logo irá estampado no frontal da camiseta, estenderase en principio por unha tempada.