Un grupo de 70 deportistas traballan estes días no Centro Galego de Tecnificación Deportiva dentro da concentración dos equipos nacionais de loitas olímpicas en categoría escolar e cadete.
En concreto están presentes representantes de loita libre olímpica, loita feminina e grecorromana en idade escolar e de libre olímpica e loita feminina en categoría cadete.
Xunto aos equipos nacionais exercítanse ademais os 15 bolseiros do CGTD, con adestramentos a cargo de diferentes seleccionadores nacionais, que este venres foron recibidos no Concello de Pontevedra.
Precisamente o Europeo Júnior que se celebrará en Pontevedra en 2019 está moi presente na concentración, xa que non son poucos os deportistas que tentarán clasificarse para a competición o próximo ano.
"Tentamos atraer estas concentracións a Galicia para que os deportistas galegos poidan incrementar o seu nivel", recoñeceu o responsable da actividade e representante da Federación Galega, Pablo Pintos, no que supón un paso máis para situar o centro de tecnificación pontevedrés como un dos puntos clave a nivel nacional no desenvolvemento deste deporte olímpico.
A concentración dos equipos nacionais de loitas olímpicas iniciouse o pasado mércores 21 de novembro e finalizará este sábado día 24.