Non cansan de gañar medallas. O pontevedrés Óscar Graña e o arousán Ramón Ferro (Kayak Tudense), seguen ampliando o seu xa extenso palmarés deportivo despois de proclamarse, por décima vez na súa carreira deportiva, campións de España de Piragüismo Maratón en C-2.
Fixérono na competición celebrada esta fin de semana en Alange (Badaxoz), co premio de lograr a súa clasificación para os próximos Campionatos de Europa e do Mundo da especialidade.
Graña e Ferro impuxéronse en meta tras unha dura pugna cos que son os seus grandes rivais nos últimos anos, os grovenses Tono Campos e José Manuel Sánchez (Breogán), que lograron tamén o billete para Europeo e Mundial e aos que avantaxaron en só 5 segundos despois de máis de dúas horas de regata. Terceiros foron Miguel Fernández e Adrián Fernández (Breogán).
Outro dos protagonistas da xornada nas probas dobres foi o pontevedrés Álvaro Fernández Fiuza no K-2 xunto ao seu compañeiro Walter Bouzán. Ao non ser do mesmo club non computaron para o Campionato de España, pero si lograron a súa clasificación internacional ao ser primeiros na clasificación.
No K-2 a sorpresa da xornada protagonizárona Iván Alonso e Diego Piña (Kayak Tudense), actuais campións de Europa e que non poderán loitar por revalidar o seu título despois de levar no Nacional a medalla de prata (terceiros en meta).
Tamén se proclamaron campións de España na segunda xornada da competición David Mochales e Carlos Canón (Illa de Arousa) na categoría C-2 Junior.