Sanxenxo estreouse con éxito no tríatlon de media distancia coa disputa este domingo do primeiro 113 Swim Ride Run.
Máis dun cento de triatletas déronse cita na praia de Silgar á primeira hora da mañá para afrontar unha competición que supoñía ademais o Campionato Galego desta modalidade.
Pablo Dapena, no seu debut na distancia, dominou a carreira de principio a fin para facerse co triunfo na categoría masculina despois de 4 horas, 7 minutos e 43 segundos de esforzo. Segundo foi Cristóbal Dios (4:23:52) e terceiro Iñaki Pena-Manso (4:28:28).
Na categoría feminina o guión foi similar cunha dominadora, Sonia Pariente, que finalizou primeira cun tempo de 4 horas, 51 minutos e 30 segundos. Completaron o podio María Remedios Carrasco (5:05:23) e María Jesús Coya (5:09:28).
Os deportistas afrontaron un percorrido de 1.900 metros de natación, 90 quilómetros de ciclismo e 21 de carreira a pé.