A solución ao mal estado do céspede do Estadio Municipal de Pasarón pasa por unha custosa intervención, e o Pontevedra Club de Fútbol falou este mércores por primeira vez dos seus plans respecto diso.
"Imos ter que levantar o campo até a drenaxe, ou incorporar unha drenaxe supletoria á que hai abaixo e metela polo medio, facer unhas novas canalizacións que permitan evacuar a auga". Así explicou a situación a presidenta da entidade granate, Lupe Murillo.
A máxima dirixente do club recoñeceu a súa frustación coa situación do terreo de xogo, sobre todo porque "hai pouco investimos un diñeiro importante que primeiro asumiu o Pontevedra e despois colaboraron as administracións, e é coma se perdésemos cada céntimo de euro que investimos neste campo. A min dóeme porque vexo o que fixemos e vexo que chega ao domingo e se encharca e non serviu para nada", sinalou con contundencia.
"A ver se un enxeñeiro diferente aos que tratan o campo asiduamente nos dá unha solución alternativa para sacar a auga de Pasarón. Porque isto é tirar o diñeiro a min dóeme moito. Cada céntimo que investimos aquí non serviu", insistiu Murillo desde a sala de prensa do estadio.
A presidenta recoñeceu ademais que o seu temor é que "o problema estea nas canalizacións do barrio. Xa empezo a pensar que igual que a parte de abaixo na Xunqueira aláganse as rúas porque non hai capacidade suficiente".
Trátase en todo caso dunha operación complexa, que "se pode ir ao millón de euros", asegura Lupe Murillo, e por iso "necesitamos axuda porque o Pontevedra non ten capacidade para asumir un investimento como ese", asegurou.
"Desde xa empezo a facer as chamadas pertinentes para que entendan que a final de tempada teño que ter unha solución, porque aquí no inverno non podemos xogar ao fútbol", defendeu.
De feito a presidenta revelou que xa falou do tema co novo secretario xeral para o Deporte da Xunta de Galicia, e pretende trasladar a situación a Concello e Deputación, e comparou o problema de Pasarón coa intervención que a administración galega acometeu no Couto, en Ourense, queixándose de que "nós mantemos Pasarón, a auga e a luz, o xardineiro tamén, a semente, o abono... E creo que estamos en desigualdade de condicións con outros clubs da mesma categoria en Galicia".
Por último, sobre a renovación do céspede acometida no verán de 2023, Murillo explicou que "tentamos buscar a opción máis económica para as administracións nun momento determinado porque me dixeron que o que pasaba era que a primeira capa de drenaxe era a que tupía todo, así que cambiamos a primeira e estamos igual que estamos, co cal o problema está máis abaixo. A auga non se vai, entón hai que ir máis abaixo, creo que non nos queda outra", resolveu.