Pontevedra vibra cunha multitudinaria edición da Gladiator Race

Deporte, emoción, obstáculos, auga e barro foron os ingredientes principais dunha nova edición da Gladiator Race, unha das probas máis consolidadas no calendario deportivo da cidade do Lérez.

Así o di a gran expectación xerada por un evento que esgotou a súa cota de inscricións no mes de marzo e que xuntou este sábado a máis de 2.000 persoas na contorna da Illa das Esculturas.

Todos eles afrontaron un percorrido de 8 quilómetros e 40 obstáculos entre os que se atopaba a xoia da coroa,o 'Mont Blanc'. Trátase dunha das probas máis exixentes do circuíto que foi reestreado nesta undécima edición despois de ser queimado no incendio do 2024.

Esta non foi a única parte exixente, pois entre todos os obstáculos que deberon de atravesar destacan as zonas de auga e barro que puxeron a proba as capacidades dos participantes.

As saídas realizáronse de forma graduada desde as 16:00 en grupos de 100 valentes persoas que, por sorte, non tiveron que afrontar unha calor extrema como si ocorreu noutras edicións.

O agradable clima permitiu aos deportistas centrar os seus esforzos físicos e mentais en superar cada obstáculo e terminar os 8 quilómetros de percorrido no menor tempo posible.

Tras finalizar esta primeira xornada chega a quenda dos máis pequenos, que correrán o seu particular Gladiator Race este mesmo domingo.

Serán máis de 400 nenos os que afronten unha versión adaptada ás súas idades con percorridos de 500 e 800 metros. A esixencia tamén será máxima, pois non faltarán obstáculos polos que subir, correr, saltar ou reptar até chegar á meta final.