Movementos no Pontevedra Club de Fútbol.
Xusto cando se cumpre un mes do último partido de liga contra o Real Ávila e só un día despois de presentar oficialmente ao seu novo adestrador, o club granate empezou a ofrecer luz sobre a confección do seu novo plantel.
Fíxoo coa confirmación das primeiras baixas oficiais, futbolistas que non renovarán o seu contrato e que poñen fin á súa etapa como granates uníndose á marcha xa coñecida de Dalisson de Almeida.
Trátase de Javi Fontán e Xabi Domínguez.
En ambos os dous casos "rematan contrato e non continuarán", explica a entidade de Pasarón.
"Desexámosvos o mellor no que está por vir e agradecemos o voso esforzo e compromiso durante esta tempada", asegura o Pontevedra na despedida dos futbolistas.
Tanto Javi Fontán como Xabi Domínguez din adeus tras só un ano no equipo. No caso do lateral arousán tras disputar 26 encontros entre Liga e Copa do Rei, 20 deles como titular e sumando 1.772 minutos sobre o céspede.
Menor protagonismo tivo o extremo, con 869 minutos xogados repartidos en 25 encontros, con 10 titularidades.