Cun sentimento de "orgullo inmenso". Así cualifica o director deportivo do Club Bádminton Ravachol Pontevedra os resultados conseguidos polos seus deportistas nos Campionatos de España Sub-19 e Sub-11 disputados en Huelva.
Foi unha cita histórica para o club pontevedrés ao lograr até cinco medallas, dúas delas de ouro e tres de bronce.
Entre elas inclúese o título de Campión de España Junior para un xoven talento como Raúl Bergua.
O pontevedrés superou nas dúas primeiras roldas o mallorquino Alejandro Yaycarov (21-11 / 21-11) e a Álex Tur, xogador do Eivissa (21-9 / 21-6). En cuartos de final tivo que remontar a súa partida fronte ao catalán David Riba (10-21 / 21-10 / 21-10), e en semifinales venceu o andaluz Rubén Carreras (21-16 / 21-11).
Xa na gran final, Bergua venceu o oscense Alejandro Gallego (21-15 / 21-16) para demostrar unha vez máis que é un dos grandes talentos do bádminton nacional.
Na competición Sub-19 destacou tamén o bronce de Carmen Carro, aínda que quedou coa espiña dunha lesión nas semifinais que lle impediu pelexar en condicións polo pase á final.
Pola súa banda Suevia García foi protagonista no Campionato de España Sub-11 con até tres metais.
Logrou o ouro en dobres feminino xunto a Eva Lemos (CB Ponteareas) e os bronces tanto en individual como en dobres mixto xunto a Pablo Fernández (CB As Neves).
"O ouro de Raúl é unha recompensa brutal a tanto traballo e esforzo. Carmen estivo a un nivel moi alto, unha pena que en semifinais non puidese render ao 100%, pero é outra gran medalla. E que dicir de Suevia… unha nena que adestra coas poucas horas que temos no Sánchez Cantón e aínda así proclámase campioa de España. Isto demostra que se está a traballar ben", explicou tras o torneo Jesús Pereiro.