O presidente da Deputación de Pontevedra, Luis López, ofreceu este luns unha recepción oficial ao Poio Pescamar polo seu recente subcampionato na Supercopa de España.
"Sodes exemplo e espello", sinalou o dirixente provincial ao plantel do equipo conserveiro, corpo técnico e directiva, afirmando que "é importante a visibilidade que lle dades ao deporte feminino".
A homenaxe prodúcese nun momento da tempada na que o Poio Pescamar pelexa por recortar a distancia que lle separa en liga do cuarto posto, que dá dereito a xogar o play-off polo título. A seis puntos, o duelo da próxima xornada en Alcorcón, rival que ocupa esa posición de privilexio, pode resultar decisivo.
Ademais o conxunto vermello clasificouse para a final da Copa Galicia, na que se enfrontará ao Marín Futsal co obxectivo de conseguir o que sería o seu cuarto título autonómico.