O culebrón non fixo máis que empezar. Cando cada vez parecía gañar máis enteiros a posibilidade de recuperar o vindeiro mércores 20 de xaneiro o Pontevedra-Guijuelo aprazado polo temporal de neve na península, a Covid meteuse polo medio.
O Guijuelo confirmou este xoves "a existencia dun novo caso positivo por Covid-19 e doutros membros do primeiro equipo que presentan síntomas", segundo sinala nun comunicado, unha situación que se sumaría a outros membros do club contaxiados con anterioridade.
ULTIMA HORA |
— CD Guijuelo Oficial (@clubdepguijuelo) January 14, 2021
El @clubdepguijuelo cancela sus ENTRENAMIENTOS ante un nuevo POSITIVO en su plantilla y varios miembros con síntomas .
https://t.co/fTPfmRQ4g0 pic.twitter.com/sKe5mqajeT
Os positivos foron detectados na rolda de test oficiais realizada aos futbolistas e corpo técnico antes da xornada de liga que debían disputar esta fin de semana no municipal vigués de Barreiro, fronte ao Celta B.
A falta de coñecer con exactitude a magnitude do posible gromo de coronavirus no cadro salmantino, o certo é que esta situación pon de novo en dúbida a data final da súa visita a Pasarón, para a que se esperaba nas próximas horas unha resolución do Comité de Competición da Real Federación Española de Fútbol.
Tanto o futbolista afectado como os compañeiros que presentan síntomas "permanecen illado actualmente nos seus domicilios", confirma o Guijuelo á espera de realizar novos test nos próximos días.