A mala fortuna volveu a cebarse co Grupo Deportivo Supermercados Froiz na primeira etapa de 50 Trofeo Bahamontes, en Ocaña (Toledo).
Dous dos seus corredores, Pedro Merino e David González, tiveron que abandonar e ser levados a un hospital tras sufrir unha dura caída no quilómetro 75 da etapa.
Especialmente doloroso é o caso de Merino, que reaparecía recuperado da súa caída en Zamora. Ambos se foron ao chan nun paso estreito cando non puideron esquivar a outro ciclista, no momento no que o Froiz tiraba na cabeza de pelotón en colaboración doutros equipos.
Por fortuna ningún dos dous sofre lesións de gran gravidade. O diagnóstico para Merino é dunha escordadura de xeonllo, polo que estará preto de tres semanas de baixa e que pon en perigo a súa participación na Volta a Galicia. Pola súa banda David González padece unha rotura de fibras no sóleo e unha fisura no cóbado, polo que estará uns 10 días de baixa, segundo confirmou o Froiz.
A primeira etapa da Volta a Toledo Trofeo Bahamontes decidiuse ao sprint con triunfo para o bielorruso Dzmitry Zhyhunoli, do Lizarte.