O candidato de Marea Pontevedra, Luís Rei e a radióloga e integrante da candidatura Mariquiña Lores mantiveron na tarde deste luns un encontro coas representantes do sindicato Prosagap, Carolina Iñarrea e Puri Quinteiro.
Neste encontro, a agrupación política coincidía co colectivo sindical na necesidade de reivindicar e conservar o uso sanitario do actual Hospital Provincial e, ao mesmo tempo, finalizar co peche de camas no verán. Esta situación, sinalan, deixa sen a atención debida a centos e mesmo a milleiros de persoas con necesidades sanitarias. Precisamente, Marea Pontevedra amosou o seu apoio na última manifestación de Prosagap contra o peche de camas previsto pola xerencia do Complexo Hospitalario de Pontevedra.
Apoian a creación dun Consello de Saúde Municipal para adaptar a atención sanitaria ás necesidades específicas das persoas de Pontevedra, mellorando a saúde e o benestar de toda a cidadanía. Desde Marea Pontevedra entenden que é necesario que as administracións traballen por un sistema sanitario que garanta a mellor atención nos centros hospitalarios públicos.