Cincuenta anos non son nada se se cumpre en tan boa saúde como a Festa da Troita de Ponte Caldelas, un dos eventos gastronómicos máis importantes das Rías Baixas. E este ano, ademais, chega cun amplo programa de actividades cheo de novidades.
Na súa presentación, o alcalde Andrés Díaz anunciou que serán as festas máis participativas dos últimos anos e apuntou que "hai máis de todo cun orzamento menor", xa que adiantou que haberá máis actividades e cun aforro de algo máis dun 13% con respecto á edición anterior, "pese a ser esta a do 50 aniversario".
Así, o alcalde sinalou que as novidades máis salientables serán o concerto inaugural da xira 2016 de Panorama, o vindeiro 10 de abril en Chan da Barcia, así como a degustación itinerante de troitas polos 23 centros socioculturais existentes no municipio.
O amplo abano de actividades festivas comezarán o 4 de abril coa apertura, no Centro Cultural, da exposición dos carteis e fotografías que participan no concurso deste ano e cuxos gañadores serán elixidos por votación popular.
O domingo 10 de abril terá lugar, a partir das 21 horas, a actuación da orquestra Panorama, na explanada de Chan da Barcia, primeira actuación da temporada 2016 na provincia de Pontevedra que espera chegar aos 6.000 espectadores. O Concello xa está ultimando un plan de estacionamentos alternativos para dar cabida á xente que asista a este evento.
A partir do 29 de abril terá lugar cada noite, a partir das 21 horas, unha degustación de troitas, por quendas, en todos e cada un dos centros socioculturais existentes no municipio dentro da vocación do equipo de goberno de descentralizar as actividades que se organizan por parte do Concello e coa intención de trasladar a celebración deste 50 aniversario a todo os lugares do concello.
O domingo 8 de maio terá lugar a III BTTroita, unha proba de bicicleta de montaña que se está a consolidar como cita obrigada do circuíto galego pola gran afluencia de deportistas e pola beleza das paisaxes por onde discorre. O evento terá lugar entre as 9 e as 15 horas con saída e final na Alameda de Ponte Caldelas.
Outra das novidades será o curso de iniciación á pesca, orientado sobre todo a menores de idade, pero tamén aberto á participación de persoas de todas as idades. As clases terán lugar os días 7 e 21 de maio e o prezo de inscrición (8 euros no caso dos cativos) irá integramente a sufragar os gastos do seguro e a licencia federativa. Os participantes non terán que asumir ningún custe a maiores xa que será costeado polo Concello.
O luns 16 de maio, con motivo da proximidade do Día das Letras Galegas, terá lugar a partir das 20 horas no Centro Cultural a actuación do cantante Manoele de Felisa, dentro do ciclo Cantos de Preto e Lonxe da Deputación de Pontevedra.
O sábado 21 de maio terá lugar a II Concentración de Motos de Ponte Caldelas, organizada en colaboración co Moto Club de Redondela que, este ano terá como lugar de concentración a propia Alameda de Ponte Caldelas.
Paralelamente á celebración do 50 aniversario da Festa da Troita a Coral Valdarrosa de Ponte Caldelas conmemora tamén nestes días as súas vodas de prata ao cumprir 25 anos da súa fundación. Para celebralo o venres 27 de maio inaugurarán, ás 20 horas no Centro Cultural, unha exposición fotográfica sobre os 25 anos de historia.
A continuación, terá lugar a entrega dos premios dos certames de carteis e fotografías e ás 21:30 horas no colexio Cordo Boullosa terá lugar a representación da obra Memorias dun neno labrego, a cargo do humorista e actor Cándido Pazó.
FIN DE SEMANA GRANDE
O sábado 28 de maio terá lugar a partir das 8:30 horas da mañá o concurso sénior e veterano de pesca de pesca deportiva, que nesta edición terá como novidade que en lugar de dúas horas desenvolverase en catro, pola mañá e pola tarde.
Ás 19 horas terá lugar na Alameda a actuación do grupo de baile tradicional Trouleada de Ponte Caldelas e ás 19:30 tomará o relevo o grupo de baile moderno do colexio Cordo Boullosa de Ponte Caldelas. A continuación actuará Aires del Norte y Olé.
Ás 21 horas na Igrexa do Sagrado Corazón de Ponte Caldelas terá lugar o Certame Coral 25 Aniversario da Coral Valdarrosa que contará como convidados ao Coro Lnec de Lisboa e á Coral Polifónica Acordes de Bueu. E a partir das 23 horas terá lugar a tradicional verbena a cargo das orquestras Gran Parada e Pontevedra.
O domingo 29 de maio, a partir das 8:30 horas da mañá terá lugar o Concurso de Pesca Feminino, Xuvenís e Infantís. De 12 a 14:30 horas terá lugar a apertura de stands de degustación na Alameda que contarán coa animación musical do pasarrúas da Banda de Música de Tenorio.
A inauguración do monumento conmemorativo do 50 aniversario da Festa da Troita, deseñado polo artista local Ortiz, terá lugar o domingo 29 de maio ás 12:30 horas nas inmediacións dos xardíns da Alameda, lugar escollido polo equipo de goberno para que teña maior lucimento e promoción da festa, ao tempo que facilita a posibilidade de que a xente poida retrarse con comodidade e seguridade ante el.
Ás 13:15 horas terá lugar a entrega de trofeos do Campionato Internacional de Pesca nas súas diferentes categorías e ás 18:30 horas será o Festival Folclórico que contará nesta ocasión coa participación estelar do grupo A Roda, ademais da Banda de Gaitas e Baile Os Coribantes de Buchabade.