A mesa de contratación da Deputación de Pontevedra coñecerá este mércores as ofertas económicas presentadas para realizar as obras de Luís Rocafort en Sanxenxo. O prezo de licitación dos traballos é de 1.650.759,28 euros, se ben agárdase que se produzan rebaixas, que se informarán por parte dos servizos técnicos do departamento de Mobilidade para eliminar as baixas ‘temerarias’ ou non xustificadas.
Coa apertura do sobre C (ofertas económicas), o procedemento de contratación das obras de mellora da avenida Luís Rocafort entra na súa fase final. Durante as últimas semanas o xefe dos servicios técnicos de Mobilidade avaliou a documentación técnica de cada unha das 21 empresas presentadas, descartando a dúas delas por non cumprir coas condicións establecidas no prego.
Unha vez coñecidas pola mesa de contratación as puntuacións do sobre técnico e as propostas económicas, realizarase unha valoración conxunta e farase unha proposta de adxudicación á Xunta de Goberno da Deputación, que deberá ratificala. Logo, a empresa elixida deberá presentar as garantías do contrato para formalizar a licitación. Unha vez os trámites burocráticos estean listos, procederase ao replantexamento da obra e iniciarase a execución. Os prazos reais de inicio e realización da obra serán acordados, no seu momento, de xeito consensuado co Concello de Sanxenxo.
Entre as empresas que se presentaron para conseguir a contrata hai tanto firmas galegas de construción que optan á obra de xeito independente ou constituídas en UTE, así como outras compañías de maiores dimensións como Obrascón-Huarte- Laín (OHL), Dragados ou Elsamex.
As obras da avenida Luís Rocafort de Sanxenxo executaranse grazas ao convenio asinado entre a Deputación de Pontevedra e o Concello de Sanxenxo. A Deputación asumiu a mellora da rúa e a ampliación do ámbito de actuación, así como o financiamento do sobrecusto derivado, pasando de aportar 606.000 euros a achegar máis de 1,15 millóns de euros, o que supón o 70% da inversión total.
O departamento de Mobilidade dirixido por Uxío Benítez tomou a decisión de corrixir e aumentar o proxecto inicial de Luís Rocafort -contratado pola anterior corporación provincial- para paliar graves deficiencias que presentaba en materia de mobilidade, accesibilidade e seguranza viaria, así como en saneamento.