O barrio da Moureira, especialmente a conexión entre o Campo da Torre e a rúa Víctor Said Armesto, está a ser obxecto dunhas obras de accesibilidade que foron deseñadas coa idea de crear un espazo peonil continuo neste ámbito urbano.
O concelleiro responsable da área de servizos urbanos básicos, Xaquín Moreda, que visitou este mércores os traballos que se están a executar nesta zona da cidade, explicou que esta actuación ten como obxectivo garantir a circulación e a seguridade da veciñanza.
A obras comezaron na rúa Víctor Said Armesto, onde se está a crear un novo paso de peóns cara á praza de touros que permitirá permeabilizar a entrada ao barrio.
Posteriormente continuarán ata a rúa Almirante Matos para darlle continuidade ao circuíto peonil e cara á rúa Celestino Poza Pastrana, onde xa se executa a reforma dun sobrante de vía pública infrautilizado para incorporalo á beirarrúa.
Ademais, respectarase todo o arborado do lugar.
Dentro desta actuación tamén se inclúen os traballos para refacer o entronque coa rúa Campo da Torre creando un espazo accesible ao retirar as escaleiras que baixaban cara a Beiramar substituíndoas por unha rampla.
Nesta zona tamén se pintará un paso de peóns que permitirá o acceso á rúa Juan Villaverde e as vivendas máis antigas do barrio da Moureira.
Engade Pontevedra Viva como fonte preferida de Google de balde
Mantente informado coas últimas noticias de actualidade.