Ante a insistencia por parte do conselleiro de Educación, Xesús Vázquez, de que a Escola de Conservación e Restauración de Pontevedra continúe pertencendo á Xunta de Galicia e non se adscriba á Universidade de Vigo, os estudantes e profesores deste centro manteñen o seu calendario de protestas.
Esta mañá do venres 4 percorreron o centro histórico formando unha cadea humana con paradas nas principais prazas da cidade. Onte á noite mostraron a súa pancarta ante o conselleiro durante a inauguración da exposición "Iso segue o seu curso".
O luns da próxima semana realizarán unha nova manifestación fronte á Subdelegación do Goberno, onde lerán varios manifestos de protesta.
E o martes ás 8 da mañá, os estudantes e parte do profesorado sairá andando cara a Santiago. Ao longo dos seguintes días comunicarán en todos os pobos polos que pasen a situación que atravesa a Escola. O venres esperan chegar a Santiago onde realizarán unha manifestación que finalizará fronte a San Caetano.