A canteira infantil do Entroido enche de alegría o centro de Marín, que apraza o desfile de adultos

O Concello de Marín decidiu, tras falar coas comparsas ante a previsión de chuvia para a tarde, aprazar o Gran Desfile de Entroido de adultos previsto para as 17.00 horas deste domingo.

A nova data vai anunciarse proximamente, segundo informan desde o goberno local.

Esta situación é moi distinta á festa celebrada durante a tarde do sábado co tradicional desfile infantil de Entroido, unha cita que destacou pola alta afluencia de participantes e público.

A comitiva iniciou o seu percorrido ás 16:30 horas dende o centro urbano, discorrendo polo itinerario habitual ata chegar ao Parque Eguren, con festa final

A meteoroloxía facilitou o normal desenvolvemento da xornada, xa que a tarde solleira permitiu que o desfile transcorrese polas rúas sen ningunha incidencia.

No que respecta ao palmarés oficial, a categoría de comparsas estivo encabezada por Os Naseiros de Marín, que obtiveron o primeiro premio dotado con 220 euros.

O segundo posto foi para Furancho “Inmaculada” (180 euros), mentres que o terceiro galardón recaeu na proposta Mel “A Inmaculada” (150 euros).

A modalidade de grupos tamén estivo moi concorrida. A agrupación As Tortas do Centenario alzouse coa primeira posición e un premio de 180 euros.

Seguíronlle a Reloxería Sei no segundo lugar (150 euros) e Brainrots-Vikingos no terceiro (130 euros). A listaxe de premiados nesta sección completouse co cuarto premio para Marín Craf (100 euros) e o quinto para Mari-Dalmatas (80 euros).

Nas parellas, o xurado outorgou o máximo recoñecemento e 120 euros a Las Diosas del Mar Reciclado.

Fantasía do Mar ocupou o segundo chanzo do podio (110 euros), seguida de Moncho y Carmucha en terceira posición (100 euros) e Guerreras del Zodíaco no cuarto lugar (80 euros).

No apartado de disfraces individuais, a proposta Alma Salvaje conseguiu o primeiro premio de 80 euros.

O segundo galardón foi para Shirley Temple y la Mascota del Regimiento (70 euros), o terceiro para O Cabaliño de Mar (60 euros) e o cuarto para Insecto (50 euros).

MANTÉÑENSE AS ACTIVIDADES DO LUNS

Para o luns 16 está previsto que se manteña toda a programación, segundo avanza o Concello de Marín, coa Festa do Merengue na Lameiriña a partir das 12.00 horas co acompañamento de Pousos da Area

A Festa Infantil vai desenvolverse no Multiusos a partir das 17,00 horas coa animación de Dolcevita.

As dúas actividades estáan organizadas por Amigos dos Rapaces e o Concello de Marín.

O Museo Manuel Torres acollerá, desde as 17.00 ata as 21.00 horas, unha tarde de Ludoxornadas

Tamén está previsto que este luns se inicie a rolda de condolencias no Concello de Marín con motivo do velorio do Enterro da Sardiña.