A pesar das previsións meteorolóxicas, o Entroido de Cobres manterá o seu programa íntegro, e a carpa instalada en Riomaior será o punto central das verbenas e dos bailes tradicionais, ofrecendo un refuxio para quen queira gozar da festa sen preocuparse pola chuvia.
O inicio oficial da celebración terá lugar este sábado co percorrido matinal das Madamas e Galáns, que percorrerán os barrios antes de chegar á carpa para a primeira gran verbena da fin de semana. A Orquesta Kubo e o trío Tic Tac animarán a noite coa súa música.
Nos días previos, Madamas e Galáns visitaron numerosos centros educativos e sociais de Vilaboa e doutras localidades da provincia, levando os traxes e as danzas tradicionais aos máis novos e despertando a curiosidade pola tradición centenaria.
Un dos momentos máis emotivos tivo lugar este xoves no Centro Social e de Maiores de Vilaboa, onde varias Madamas e un Galán compartiron a tarde coas persoas usuarias, evocando lembranzas e emocións antigas.
Entre os asistentes destacou María Lino, que volveu bailar tras 28 anos de ausencia, acompañada do seu marido e dunha irmá que tamén retomou a tradición tras 13 anos.
María amosou orgullosa un sombreiro familiar de máis de 50 anos, feito pola súa bisavoa para a súa avoa, unha peza que simboliza a transmisión xeracional deste patrimonio inmaterial.
Durante a visita ao centro de maiores, Madamas e Galáns foron recibidos pola concelleira de Servizos Sociais, María Canosa, e polo alcalde, César Poza, que subliñaron a importancia de que o Entroido de Cobres sexa declarado Festa de Interese Turístico Nacional, recoñecemento que consolidaría o valor cultural desta tradición mantida viva grazas ao compromiso e ao cariño da veciñanza, especialmente da parroquia de Cobres.
Así, Vilaboa dá comezo a unha nova edición do Entroido, mantendo viva a súa esencia e reafirmando o seu papel como un dos grandes referentes culturais de Galicia.
Engade Pontevedra Viva como fonte preferida de Google de balde
Mantente informado coas últimas noticias de actualidade.