Centos de persoas desafían a chuvia en Caldas para gozar do Entroido

A inestabilidade meteorolóxica non foi freo para que as rúas de Caldas de Reis acolleran este domingo, 15 de febreiro, o seu tradicional Desfile-Concurso de Entroido.

A xornada estivo marcada pola presenza de paraugas entre o público, que seguiu o percorrido da comitiva polas rúas do centro urbano.

O desfile, que partiu ás 17:00 horas do Paseo Román López, contou coa participación de propostas baseadas en diversas temáticas.

Entre os disfraces destacados atopábanse os personaxes dos Picapedra co seu vehículo, recreacións de compañías aéreas, un elefante e figuras cinematográficas como o Gollum de O Señor dos Aneis ou a representación do Cine Avenida.

A organización, a cargo do Concello de Caldas de Reis, estableceu un itinerario obrigatorio para todos os aspirantes aos galardóns, garantindo así a seguridade e a accesibilidade durante todo o traxecto.

A convocatoria deste ano conta cunha partida orzamentaria total de 6.190 euros, distribuída en numerosas categorías para fomentar a participación de todas as idades e formatos.

O xurado, composto por representantes de entidades municipais, avaliou aspectos técnicos como a animación, a orixinalidade e a música propia dos participantes tanto en grupo como individuais.