O Centro Comercial Aberto (CCA) Estrela de Marín presentou este martes 'O Escaparate Estrela', unha campaña de dinamización comercial que se perfila como a iniciativa máis ambiciosa da súa historia.
O obxectivo principal é fomentar as compras no comercio local e premiar a fidelidade da clientela.
A campaña, que se desenvolverá entre o 1 e o 11 de outubro, propón un concurso baseado na tradicional mecánica de acertar o prezo xusto dun escaparate.
O premio está valorado en miles de euros e está composto por máis de 100 produtos e servizos achegados polos establecementos asociados.
Para participar, os consumidores deberán acumular polo menos 60 euros en tickets de compra nos comercios adheridos. Unha vez alcanzada esta cantidade, poderán rexistrarse e realizar a súa estimación do prezo total do escaparate.
O gañador será aquel que se achegue máis ao valor real sen pasarse.
Ademais, quen se rexistre na aplicación "Comercio de Marín" obterá unha oportunidade adicional para participar.
O formulario para subir os tickets estará habilitado o 11 de outubro ás 11:00 horas.
A campaña conta coa colaboración do Concello de Marín e a cofinanciación da Xunta de Galicia.
Segundo explicou o director-xerente do CCA Estrela de Marín, Yonathan Carreira, a iniciativa busca visibilizar a diversidade e a calidade da oferta comercial da vila, á vez que incentiva o consumo responsable e de proximidade.
O punto culminante da campaña será unha gala final que se celebrará o sábado 11 de outubro ás 19:00 horas, presentada pola artista Lucía Pérez, quen interpretará en directo o tema oficial da campaña.
A actuación estará acompañada dunha coreografía dirixida pola bailarina e coreógrafa marinense Iria Calvar.
Paralelamente, presentouse tamén unha nova edición do Festival Internacional de Maxia Infantil de Marín, xunto con outras actividades previstas para o mesmo día, que converterán á localidade nun espazo de celebración e entretemento para todos os públicos.
Desde o CCA Estrela de Marín anímase a toda a cidadanía a participar nesta campaña que busca reforzar o tecido comercial do municipio.
Engade Pontevedra Viva como fonte preferida de Google de balde
Mantente informado coas últimas noticias de actualidade.