Aínda que chova o próximo 5 de decembro, Pontevedra acenderá as súas luces do Nadal. Así o garantiu o alcalde, Miguel Anxo Fernández Lores, durante a visita que realizou ás tarefas de montaxe da Aldea de Nadal que estará na Praza da Ferrería.
"Non podemos deixar de encender o alumeado", sinalou Fernández Lores, que explicou que o acto oficial de aceso, previsto para o sete da tarde, farase "con paraugas ou sen el" e non se instalará unha carpa para protexerse da choiva.
O alcalde confía en que o tempo "nos respete", pero avanzou que a organización estará "preparada" e, no caso de que chova, "probablemente non será tan espectacular" pero a iluminación activarase de todos os xeitos.
En toda a decoración do Nadal, incluídas as luces, o goberno municipal de Pontevedra investirá este ano uns 350.000 euros, ao que se sumarán iniciativas particulares nas que colabora o Concello como a impulsada polos comerciantes de Joaquín Costa.
"Gústanos que a xente demande cousas e, sobre todo, que colabore", destacou o alcalde, que explicou que estes comerciantes pediron "darlle unha volta" á iluminación.
Así, entre outros elementos, impulsaron que se colocasen luces nas árbores ou bólas de luz ás portas de cada comercio que colabora nunha iniciativa que Lores agradeceu porque "é moito máis fácil facer as cousas así".
O alcalde espera que esta colaboración poida servir de exemplo para dinamizar outras zonas da cidade durante todo o mes que Pontevedra conmemora estas festas porque, engadiu, "que a xente se sinta partícipe do Nadal é marabilloso".
Con respecto á Aldea de Nadal, que este ano fará unha chiscadela cinematográfica aos Feroz, Miguel Anxo Fernández Lores indicou que as empresas pontevedresas Taller Abierto e Era Comunicación están a deixar "preciosa" a Praza da Ferrería.
"Espero que a cidadanía disfrute porque estamos convencidos de que este esforzo vale a pena", sentenciou o alcalde, para "promover alegría" nun momento que, ademais, é moi importante para o comercio local e a propia economía pontevedresa.