A partir de hoxe martes, 1 de xullo, os traballadores e traballadoras do sector da construción na provincia de Pontevedra comezan a aplicar unha medida pioneira en Galicia: a xornada continuada de verán.
Esta iniciativa, que se estenderá ata o 31 de agosto, foi impulsada polo sindicato nacionalista CIG, maioritario no sector na provincia, e busca principalmente protexer a saúde laboral durante os meses de máis calor.
A medida, incluída no convenio colectivo provincial, converte a Pontevedra na única provincia galega onde os traballadores da construción poden beneficiarse desta mellora nas súas condicións laborais.
Segundo informa o sindicato, esta conquista é froito de máis dun ano de mobilizacións e negociacións.
"Non se trata só de protexer os traballadores fronte ao estrés térmico propio do verán, senón tamén de favorecer a conciliación da vida laboral e persoal nun sector especialmente esixente", explican fontes da CIG, que destacan o carácter "integral" desta medida de benestar laboral.
O sindicato nacionalista non quere quedarse aquí e xa anuncia a súa intención de estender esta e outras melloras ao ámbito galego.
A súa proposta pasa pola creación dun convenio marco galego da construción que permita decidir desde Galicia "as condicións laborais do sector, sen imposicións nin tutelas alleas".
"Queremos un convenio galego que nos dea capacidade de decisión no noso país, e que non nos veña marcado dende Madrid", subliñan dende a CIG, que considera "inadmisible" que mentres en Pontevedra se conseguiu esta mellora, nas outras provincias galegas os traballadores continúen sen esta medida por carecer dun convenio propio ou estar vinculados ao estatal.