O delegado do Goberno en Galicia, Pedro Blanco, visitou esta semana Caldas de Reis co obxectivo de coñecer de primeira man as inquedanzas do municipio sobre o estudo do Variante Oeste e a súa conexión co Porto de Vilagarcía.
Á súa chegada, foi recibido na Casa Consistorial polo alcalde, Jacobo Pérez, quen lle expuxo con detalle as distintas alternativas expostas no estudo e os motivos polos que o Concello oponse á proposta actual.
Segundo explicou o rexedor, o proxecto, tal como está redactado, podería supor un prexuízo para parte da veciñanza, algo que desde o goberno local queren evitar custe o que custe.
Jacobo Pérez agradeceu a visita e o compromiso de Pedro Blanco, destacando a súa sensibilidade co tema:
"É unha preocupación real que se demostra con que se desprazase até Caldas de Reis para escoitar as nosas demandas e por promover a reunión da próxima semana con representantes veciñais, polo cal lle estamos moi agradecidos", sinalou.
Esa reunión celebrarase na Coruña e contará coa participación do propio delegado do Goberno, o director xeral da Demarcación de Estradas do Estado e un representante de cada parroquia afectada.
O obxectivo é pór sobre a mesa todas as preocupacións e buscar unha solución consensuada.
A visita de Pedro Blanco súmase á recente reunión que Jacobo Pérez mantivo co subdelegado do Goberno en Pontevedra, Abel Losada.
Desde o Concello de Caldas de Reis aseguran que seguirán traballando sen descanso para lograr que o proxecto do Variante Oeste teña en conta a voz da veciñanza e se execute sen supor un agravio para a cidadanía.