Dezasete minutos de luz e balbordo pirotécnico na noite máis festeira

Multicolor quedou o ceo na primeira hora da noite deste domingo, cando ás 00:00 horas comezou o primeiro espectáculo pirotécnico das Festas da Peregrina 2025 na noite con máis actividade nas rúas da cidade.

Durante 17 minutos, a Pirotecnia Penide despregou un rítmico xogo de luces que culminou cunha estrondosa traca final, arrancando aplausos do numeroso público que se achegou á zona da desembocadura do Lérez.

Con temperaturas agradables que superaban os 20 graos e un ceo despexado, as condicións meteorolóxicas foron perfectas para que centos de persoas puidesen gozar dun espectáculo visible mesmo desde distintos puntos da zona sur da cidade.

Este foi só o primeiro dos tres espectáculos pirotécnicos programados para estas festas, que terán continuidade os vindeiros venres 15 e domingo 17 de agosto, sempre desde o mesmo punto de lanzamento: o aparcamento fronte ao Pavillón Municipal de Deportes.

Para estas próximas citas, o Concello de Pontevedra volverá activar un dispositivo especial de tráfico.

Estará prohibido estacionar desde as 15:00 horas do día anterior ao lanzamento ata as 08:00 horas do día seguinte no propio estacionamento e nas rúas Xoan Manuel Pintos, así como no tramo da avenida de Compostela entre a esquina de Rafael Areses e o Pavillón Municipal.

Ademais, a circulación quedará restrinxida entre as 23:00 e a 01:00 horas na zona comprendida entre a Ponte das Correntes e a Ponte dos Tirantes (avenida de Bos Aires), así como en Rafael Areses, avenida de Compostela (desde a rotonda de Pasarón ata o cruzamento coa Cruz Vermella) e Xoan Manuel Pintos.