Para o Partido Popular, a inminente renaturalización do Gafeños, co 'destape' do tramo que transcorre soterrado por Campolongo, debe executarse en condicións "óptimas" para que estes traballos, que se prolongarán durante un ano, non provoquen "malestar veciñal".
O seu portavoz, Rafa Domínguez, reiterou que o PP apoia esta actuación, pero esixiu ao goberno municipal que reforce o control sobre o resultado porque, ao seu xuízo, "pecan sempre de facer obras e que o mantemento sexa absolutamente deficiente".
"Destapar un río urbano é unha boa obra sempre e cando se faga ben", recalcou, polo que pediu "vixiar de cerca" algúns dos aspectos desta actuación.
Así, o líder popular reclamou que o proxecto sexa "especialmente sensible" co risco de inundacións que poidan xurdir en Campolongo ao liberar a canle do río, a pesar de que esta actuación xa conta co aval técnico de Augas de Galicia.
A este respecto, o dirixente do PP instou a que se teñan en conta "todos os escenarios posibles" para descartar que non exista "o máis mínimo risco" de que o río se desborde, "e máis tendo en conta o que estamos a vivir co cambio climático".
Domínguez reivindicou tamén que os traballos se desenvolvan "coas mínimas molestias" para os veciños, xa que lembrou que se trata dunha zona pola que pasa "moitísima xente" e existen numerosos equipamentos, entre eles varios colexios.
A iso sumou que durante e, sobre todo, despois de terminar as obras se deseñe un plan de desratización porque ao liberar o río "esa fauna é posible que suba á superficie" e atopará un espazo verde "moito menos hostil" que a cidade.
Pediu ademais que se vixíen posibles estancamentos de auga en épocas de seca porque "podemos atoparnos cunha praga de insectos ou malos cheiros" ao converterse algún tramo do río en "charcas" cheas de mosquitos ou bechos "que son moi molestos".
Isto xeraría, segundo Domínguez, un "ecosistema ideal" para a chegada de "aves carroñeiras", entre as que citou gaivotas e pombas, "que se comen os churros nas cafetarías".
Dentro das súas esixencias, o político conservador incluíu que este ámbito estea "ben iluminado" para que non sexa "colonizado" por persoas sen fogar "que xeren conflitos sociais", ofrecendo unha contorna "amable e segura" para toda a cidadanía.
Ademais, o portavoz do PP pontevedrés criticou que a xestión "errática" do executivo local fixera que o Concello estea a piques de perder os dous millóns concedidos a Pontevedra de fondos europeos para esta actuación, ao non cumprirse os prazos de execución.
"É sumamente grave que os pontevedreses esteamos afeitos a que o Concello perda subvencións millonarias pola inoperancia e a incapacidade do alcalde e de oito concelleiros", lamentou Rafa Domínguez.
Como as prórrogas están a piques de caducar, a última aprobada é até o 30 de xuño deste ano, Domínguez sostén que as arcas municipais terán que asumir o custo total da obra.