Axentes da Garda Civil interceptaron esta madrugada unha condutora, veciña de Vilagarcía de Arousa, que circulou "decenas de quilómetros" en sentido contrario pola AP-9.
Así o confirmou o propio instituto armado, que indicou que a muller, que deu positivo na proba de alcoholemia, será investigada por un delito contra a seguridade viaria.
A condutora foi interceptada na peaxe de Teo, na Coruña.
Foi despois de que, sobre as 02:40 horas da madrugada, varios condutores alertasen de que un coche circulaba cara a Santiago polos carrís da autoestrada en dirección a Pontevedra.
Tras interceptala na peaxe, os axentes realizáronlle a proba de alcoholemia que, ao resultar positiva, provocou a súa detención.
A circulación desta 'kamizake' pola autoestrada non provocou ningún accidente.
A súa conduta, con todo, supuxo un grave risco para a circulación, segundo apuntan desde a Garda Civil.
Non transcendeu o punto no que esta condutora accedeu á AP-9.
En todo caso, as chamadas de alerta aos responsables de emerxencias indican que a súa marcha comezou na provincia de Pontevedra.