Xa están en marcha as primarias organizadas por Marea Pontevedra para avanzar na confección da candidatura coa que se presentará ás eleccións municipais de 2019. E, nesta ocasión, chega con novidades.
O partido asegura que con estas primarias elixiranse ás persoas que ocuparán os postos do 3 ao 10 da lista electoral. Todos os interesados en participar neste proceso deberán presentar a súa candidatura antes do próximo 24 de outubro.
Pero a asemblea xeral de Marea determinou que o posto número 2 da candidatura que encabezará Luis Rei sexa ocupado por unha persoa de relevancia política e social que no seu momento someterase a ratificación dos inscritos na formación.
Marea toma esta decisión, sinalan desde o partido, pola relevancia destas eleccións, a necesidade de abrir un maior espazo político e electoral e competir pola alcaldía da cidade.
O resto da lista (do posto 11 ao 25) así como os suplentes será aprobada, a proposta da coordinadora xeral, nunha asemblea posterior a este proceso de primarias atendendo a criterios de idoneidade, xénero, idade e representación social e parroquial.
As votacións, que terán o equilibro de xénero como única corrección, iniciaranse o domingo 28 de outubro pola vía electrónica. A xornada electoral de votación en urna será tres días despois, o mércores 31.