Antón Louro, unha das figuras clave no PSOE de Pontevedra, faleceu esta madrugada aos 73 anos de idade.
Louro, que deixara a primeira liña política en 2015, foi un dos referentes do socialismo galego, do que chegou a ser o seu secretario de organización.
O seu traballo foi clave para a vitoria electoral que levantou a Emilio Pérez Touriño á presidencia da Xunta de Galicia no ano 2005.
Nacido en Lira (Carnota) en 1952, era licenciado en Químicas pola Universidade de Santiago e traballou como profesor de instituto ata que deu o salto á política.
Tras ser concelleiro en Pontevedra, entre outras responsabilidades públicas, foi deputado no Parlamento galego entre os anos 1997 e 2004.
Foi entón cando renunciou ao cargo para encabezar a candidatura do PSOE ao Congreso por Pontevedra, responsabilidade que mantivo ata que en 2009 foi nomeado delegado do Goberno en Galicia.
Xa entón regresara tamén á política local. En 2007 foi o número 2 da candidatura encabezada por Teresa Casal e foi o candidato proposto polo PSOE para presidir a Deputación de Pontevedra, da que quedou moi preto.
En 2011, os socialistas elixírono para encabezar a candidatura á Alcaldía de Pontevedra e, como o catro anos anteriores, formou parte do goberno municipal, nesta última etapa xa como tenente de alcalde e responsable da área de urbanismo.
A final dese mandato, en maio de 2015, decidiu abandonar a primeira liña política.
PESAR NO SOCIALISMO GALEGO
A morte de Antón Louro provocou unha onda de mostras de condolencias na política galega, especialmente entre os seus compañeiros do PSdeG-PSOE, que se despediron del a través da rede social X.