Este domingo, 21 de decembro, a tradición e a solidariedade uniranse na agardada Papanoelada Moteira de Poio, organizada pola Asociación A Rosa dos Ventos, que prevé reunir a preto de 350 participantes.
A Papanoelada Moteira, unha das citas ineludibles do Nadal na vila, dará comezo ás 17.00 horas dende A Reiboa, en San Xoán.
A caravana de Papanoeis sobre dúas rodas percorrerá todas as parroquias do municipio, facendo unha parada especial en Combarro, co obxectivo de contaxiar a maxia destas festas entre toda a veciñanza.
A xornada estará amenizada con música, lambetadas e animación, e culminará cunha degustación de callos e chocolatada para os participantes, ademais da entrega de trofeos e premios ás tres motocicletas mellor adornadas do evento.
Paralelamente, a animación estenderase a Combarro coas novas propostas da AC Leucoíña. Por primeira vez, a Praza da Chousa acollerá a "Tardeboa" e a "Tardevella", os días 24 e 31 de decembro, respectivamente, a partir das 18.00 horas.
Estes "tardeos", pensados para todos os públicos, prometen moita animación na rúa e música en directo co DJ Arrow.
Dende a asociación convidan aos asistentes a vestir os seus mellores xerseis e accesorios de Nadal para contribuír ao ambiente festivo.
A oferta en Combarro complétase co Mercado de Nadal, tamén organizado por Leucoíña, que permanecerá aberto ata o 4 de xaneiro.
Neste espazo, os visitantes poderán atopar unha variada selección de postos con artesanía, decoración de Nadal e agasallos orixinais para estas datas.
O Mercado abrirá as fins de semana e festivos de 11.00 a 14.30 e de 16.30 a 20.30 horas, e os venres de 16.30 a 20.30 horas.